SAMBRAMA WACANA
PERPISAHAN SISYA KELAS XII
Suksma aturang titiang antuk galah sane kapaica ring sikian titiang.
Sane singgihang titiang, Ketua Komite SMK N 1 Klk,
Sane wangiang titiang, Bapak Kepala SMK N 1 Klk, Wakasek, Bapak/Ibu Guru, Staf Tata Usaha, SMK Negeri 1 Klk lan sawitran-sawitran titiang sane tresna sihin titiang.
Pinih riin ngiring sareng-sareng ngastiti bakti ring Ida Sang Hyang Widhi Wasa duaning asung kerta waranugraha Ida irage sareng sami prasida mapupul iriki kenak lan rahayu ring acara palepasan sisya kelas XII malarapan antuk ngaturang panganjali umat.
"OM SWASTYASTU"
Bapak/Ibu Guru lan sawitran titiang sane wangiang titiang,
Tan kerasa galahe sampun tigang warsa majalan. Ring rahina sane mangkin titiang lan sawitran titiang sisya kelas XII sampun kawastanin puput ngalaksanayang swadarmaning sisya ring SMK N 1 Klk. Ritatkala ngelaksanayang swadarmaning sisya iriki, akeh pisan sane sampun polihang titiang lan sawitran-sawitran titiang. Rasa liang, sebet, manis miwah pakeh sampun kerasayang bareng.
Kerasa engsek ring manah ritatkala iraga sareng sami jagi mapisah nyalanang swadarmaning soang-soang jagi ngerereh pangaweruhan ngelanturang ring jenjang Universitas. Banget pinunas titiang sampunang iraga sareng sami pegat pasawitran pegat penyaman. Mangdane pasawitran lan penyaman sane sampun kabuat tigang warsa ngancan rumaket ngantos kawekasan. Sampunang irage sareng sami lali majeng ring Almamater SMK N 1 Klk lan sampunang lali ring Ibu/Bapak Guru sane sampun ngajahin ajah-ajah ngantos iraga uning.
Ritatkala ngerereh pangaweruhan ring jenjang Universitas, ngiring sareng-sareng jemetang pisan mangdane iraga sareng sami dados mahasiswa sane becik lan weruh ring bidang ipun. Tan pewali Almamater SMK N 1 Klk ngerasa bangga antuk pabuat iraga jak mekejang. Sampunang pisan iraga sareng sami maparilaksane sane nenten becik lan ten manut sane mawinan Almamater iraga duka.
Bapak/Ibu Guru lan sawitran titiang sane tresnain titiang,
Titiang dados perwakilan sisya kelas XII ngaturang suksma majeng ring Bapak/Ibu sane sampun ngajahin ajah-ajah ngantos titiang sareng sami uning. Dumogi napi sane kaptiang prasida kapanggihin. Tan lali titiang sareng sami banget nunas pangampura yening wenten iwang ritakala tigang warsa nuntut ajah-ajah iriki ring SMK N 1 Klk.
Sampun puput sambrama wacana titiang dados perwakilan sisya kela XII. Yening wenten titiang iwang matur sane tan manut. Kirang langkung titiang nunas geng rene sinampura. Puputang titiang antuk paramashanti.
"OM SHANTI. SHANTI, SHANTI OM"
